طبيعي انو تكون الاساطير البتزبط بالاخص بين هفيستوس واتينا نشهرت بالاتيك، مطرح ما نعرف البطل فولكان كسيد العمال الصناعيي. وكان ساكن بحين مع الآلها اتينا، شفيعة المديني الحاملي اسما. وكانت اتينا كـ حاميي للصناعيي حاملي اسم اتينا هفيستيا وتترأس هيي وهفيستوس "المأسسات الفنيي الخيريي "وتجمع بين الفلسفي والتقنيي".
يا ترى ايروس ابن عشتروت هو ابن هفيستوس؟
سبق وقلنا ان سنخوني اتن عتبر البطلين المألهين أو توكتون وتكنيتيس متحدرين من كريزور وهفيستوس بس ما منعرف بالميتولوجيات الغربيي أبطال بيقابلون. كل المنعرفو انو "ايروس"، ملاك الحب المجنح، هو ابن عشتروت الشهير وانو البعض بيعتبروه ابنا من هفيستوس بس ايروس هادا، بيزكرو سنخوني اتن، تيقول انو هو ابن عشتروت من ايل كرونوس. ومنفسر هـ الشي بانو كلمة هفيستوس او فتاح هيي لقب (لخاسس- وكاش "أو هاين- فولكان") كانو يحملو كل الابطال- الآلها الل بأولن كان ايل كرونوس. ع كل حال، الشي الاكيد هو انو ايروس البيزكرو سنخوني اتن، هو هو هورس ابن "أزيس- هاتور" الهي واحدي من أول ملكات مصر والل برهنا انها عشتروت بزاتا.
وكدميل الل هو تور- هرمس منو ابن هفيستوس- فولكان؟
بـ ميتولوجيات الغرب (وخصوصن بتقاليد جزر أمبروس وساموتراس ولمنوس) بيزكرو كمان ان هفيستوس تجوز كبيرو الل جابتلو تلات كبيريم، وانو كبير الكبيريم وأربعين المعروف بـ"كدميلوس أو كميل، أو قدموس، هو لقب شرف مألف من كلمتين فينيقيي هني آدم وايل، وتنين معناتن "الأول". يعني الكلمتين لقب صدارا بيطلقوه ع الأول من بين أفراد شعبو (ومنن جايي كلمة قدام). وأشهر الل حملو هـ اللقب- من عدا الله الل كانو يعدوه أول الاولين- هوي ايل- كرونوس ملك جبيل وأول ملك للبنان والعالم، وخصوصن تور، أول العباقرا بـفينيقيا.
وتور هرمس- مركور هوي الل نشهر بالعالم الفينيقي باسم كدميل.
وتور هرمس متلما منعرف، هو ابن مصر ومايا بنت اطلس مش ابن هفيستوس- فولكان. وصرنا نعرف كمان انو كلمة هفيستوس- فتاح او الفاتح، هي لقب شرف حملوه كل الفاتحين الفينيقيي اللي منن مصر، بي تور، وواحد من الفتتحو مصر (هك العطاها ايمو). فازن الارجح انو يكون الفاتح المقصود بـ بتقاليد الجزر هو فتاح- مصر- بي تور، مش هفيستوس- فولكان.
يا ترى اركتونيوس وابولون باتروس هن ولاد هفيستوس من اتينا؟
وفي تقاليد تانيي بتقول انو اجا لهفيستوس- فولكان ولاد تانيين منن اركتونيوس (الل حكينا عنو بـ معرض كلامنا ع عنت- اتينا)، ومنن هليوس (الشمس) الل بيعتبرو كمان متلما بيعتبرو ابولون باتروس ابن هفيستوس واتينا (ويمكن يكون هوي هوي اركتونيوس ع عتبار انو لقب ابولون هو تحريف البعل الل هو لقب شرف فينيقي متل فتاح هفيستوس.
مينن ولاد هفيستوس الحقيقي؟
ومن ولاد هفيستوس بتزكر الاساطير بريفتيس بـ ابيدور واردالوس بـ تريزين الل كان، متلما مبين، نحات ماهر وصنايعي متفوق متل بيو. وكمان نجح ابنو بالايمون، الهو واحد من الارغنوت، بفنون وصنايع عديدي. ونعرف لـ هفيستوس ولدين تانيين هن بيليوس واولينوس، وبنت بيزكرا اشيل باسم تاليا بيعتبروا من الباليك الصقليي.
وكان في بـ أتينا عيل من النبلا بتدعي انا من سلالة هفيستوس. وهادا شي مش غريب علينا بما انو اغلب عيل النبلا الاتينيين كانو يدفعو مصاري للعرافين ت ينسبون لـ الابطال المألهين او الآلها الجايين من فينيقيا. وأبرز القصص ع هـ الشي متل الاسكندر الل دعّى- حتى يقدر يدخل لـ صور- انو سليل ملكرت- هركل الصوري.
