د- يصب ابن ملكرت وإنصاف الارملي واليتيم.
بين أغرب الشخصيات الاوغاريتيي شخصية الامير يصب الهو واحد من ولاد الملك كرت. لمّن مرض بيّو وأشرف ع الموت، قعد بالهيكل وصار يستلهم الآلها، ورجع فات ع بيّو وطلب منو انو يتخلّى عن الحكم بحيس صار عاجز ومريض، وما بيقدر يقوم بمهام الملك: القضاء بالعدل للأرملي وإنصاف اليتيم وحماية القاصر والزليل".
هـ المقاطع الروعا اللي بملحمة كرت بتدل ع انو مهام الملك بكنعان- فينيقيا ما كانت الاستئسار بالملك والجاه (متلما عميصير هلّق)، كانت بالأحرى العمل على إحلال العدل والتخفيف من مصايب المناصبين وحماية الضعاف. أولى مبادئ العدالي والمحبي. ومنلفت النظر لانو هـ المقاطع الخاصّا بالأرملي واليتيم بترجع نورد متلما هي هون عدة مرّات بالتورا كمبادئ بتنبنى عليا السلطا.
هـ - وإلحو ابن ملكارت وإختو تامني (او تميمي).
ببيّن إلحو من خلال ملحمة كرت حنون ومحب ومقهور ع مرض بيو وبيحضّرلو ندبي بيقول فيا انو الناس والجبال وحتى "الرايات المقدسي" عمبتبكي ع كرت. وبيخفف كرت من حزنو وبيطلب منو إنّا اختو تامني تجي لعندو. بتعتب عليه تامني، لانو تأخر تخبّرا. وحزنو تنينن ع مرض بيّن البطل، وتساءلو كيف بيموتو الابطال وبينعطالن الخلود؟. بس كرت اللي عرف انو تامني شفوقا، بيطلب من إلحو انو ما يخبّرا انو بيّا عمل وليمي، ولازم تاخد دفّا وصنجا وترتّل وتقدم القرابين للإله إيل. ساعتا بيرضى وبيشفي كرت. وهيك صار.
قدّامنا عدة استنتاجات من النصوص العن إلحو وتامني، اهما البيتعلق بالصلوات المرفقا بالرقص الغنائي. كانت الموسيقى ترافق ساعة الحزن، متلما كانت ترندح بمواقف الفرح. وكانو يعزفوا تحت الشعارات الدينيي ويمولو بالوقت زاتو الولايم لـ الالها ويدعو للصلوات.
ز- شغتقا اللبنانيي أول طبيبي بيزكرا التاريخ.
بعد ما مرض كرت وصار مرضو عضال، جاوبولو اهلو من بعيد طبيبي اكيد كان إلا شهرا هيّي شعتقا. داوت الملك بالسحر والنباتات الطبيّي: بلّشت ببعض الصلوات والتعاويز السحريي (وكانو بفينيقيا، متلما قلنا، يباشرو هـ الاشيا تحت راية القداسي) وبعدين باستعمال بعض النباتات المنا الخاتميّي (او الختيمي)، وهيك شفي كرت.
منفلت النظر انو من بداية التاريخ كان الطب متقدم بفينيقيا. وبدراستنا اللي ع اشمون- اسكولاب، قلنا انو هـ البطل المأله اللي عتبروه إله الطب "الكان يقيم من الموت"، كان رفيق تور الواضع إسس كل العلوم والفنون، ومنّا الطب.
ح- الاله الأمير القمر- يرخ- سين- سنيلي- لونا- اللي القمر بيحمل اسمو.
مرّا واحدي بتزكر ملحمة كرت الامير القمر ( ن ب ل. ي ر خ) و (زبل بتعني الامير). وبينشاف القمر بين اللي حضرو عرس الملك كرت. وبتزكر ملحمة البعل وعنت الخادمي تالش، متل م بتزكر ملحمة دان ايل (دانيل) ضيعتو الأبليم (ضيعة الامير القمر صاحب المجدل) تتقول إنو فيا نقتل البطل اقهات.
فازن الملاحم ما بتزكر يرخ- القمر الا بصورا سطحيي. كمان ما بيزكرو سنخوني اتن. ويمكن لهـ السبب عتبرو القمر إله تانوي.
نحنا مش من هـ الراي، لانو الاله القمر، اللي بعدا بلدة دير القمر بلبنان بتحمل اسمو، واللي عطا اسمو لـ القمر، لسد ما يكون شخصيي بارزي. وما بيخفى ع العلما انو كلمة قمر هي ترجمة لكلمة صين أو سين وسين هو واحد من اسامي القمر الل نعرف فيه بـ ميزوبوتاميا متل م نعرف باسامي قريبي الو عند الاوروبيي (واسم الالها القمر عندن سليني او لونا، وهـ القمرا كانو يدمجوا بعض الاحيان بـ ديانا). بس "نشيد الاله سين"، اللي نوجد بمكتبة اشور بنيبال، بـ نينوزا (اليوم كويونجك)، مع نص الطوفان الشهير، بيعطي سين أهميي كبيري متل أورانوس بالزات. يمكن لان اورانوس هوّي شميم- السما والقمر مركزو بالسما، عطيوه للقمر صفات هي لأورانوس. لهيك حطّوه فوق شمس (الشمس) الإله اللي ندمج بإيل كرونوس ابن اورانوس ونعرف سين انو إله مدينة "أور"، بيّ عشتار (عشتروت)، يعني أورانوس، وتسمّى كمان ننّور أو ننّارو.
ع كل حال في بلبنان ضيع يمكن تكون حاملي اسم سين. متل م انو هـ الاسم يمكن يكون نعطى لشبه جزيرة سينا وحتى للصين. خصوصن متلما نعرف انو تور- هرمس وصل للشرق الاقصى. كمان لتقى بأكتر المناطق هونيك، نصوص بتحمل اسامي آلهتنا، وأهرام ما كانو يقدرو يرفعوا إلاّ اسياد البحور، يعني الفينيقيي.
اهم شي لازم نعرفو عن يرخ القمر، (وبيورد "يرخ" كمان بشكل "ورخ" و"أرخ" ويرخ- وبعدا لهلق مدينة اريحا بتحمل اسمو- انو اسمو يمكن يكون نعطى للتاريخ متل ما نعطت اسامي رفقاتو للعلوم والصنايع التانيي.
وقبلما نختم هـ الكلمي عن القمر، مهم نقول انو القدما كانو يعتبرو الشمس والقمر اخوي، وانن من نسل اورانوس وابنو طيطن، بس هني أنّسو القمر وزكّرو الشمس، بالعكس عن الشي الورد بالملاحم الاوغاريتيي. نحن عطينا رأينا بهـ الموضوع وقلنا انو الشمس كانت ملقّبي بالملاحم الاوغاريتيي بـ"نور الالها" كانت لقب لـ الالها ورجعت تحوّلت تدريجين للقب لـ الاله ايل كرونوس بالزات ورجعت ندمت فيه.
