ما بيورد زكر رشيف، الإله الشهير بملاحم اوغاريت الا مرّتين بملحمة كرت مطرح ما منشوفو بين الحضرو عرس كرت وحوريّي. بيسميه شاعر اوغاريت الملك نقماد: الامير رشف. بس اللي منعرفو عنو من مصادر تانيي، بيخلينا نقول انو هو من الشخصيات المألها بملاحم إيبلا والبتعود لـ الالف التاني قبل المسيح. وكمان منشوف آسارو ومكتوبات بتحكي عنو مش بس بلبنان كمان بأغلب مناطق العالم المتلبنن، الشي البيخوّلنا نحكي عنو ولو بشوية غموض، ت تكون تترجمت ملاحم ايبلا القريبي من المنابع.
من اهم الدراسات الـ ع رشف دراسة فان دن براندن الل بعنوان "الاله رشف مواصفاتو" وبعدين مقالات "الريال انسكلوبيديا" لـ بير، وماتيي، وفاتيوني وفيكتورو ودي فوغوي، وماسبيرو وخصوصن دي مسنيل دي بويسون بكتاباتو "دراسات ع آلهة الفينيقيي اللي ورتتن الامبراطوريي الرومانيي" واليبأكد فيا انو رشف إله فينيقي وكان بعدو الاله الرئيسي بجبيل.
ع كل حال تبيّن لـ العلما انو رشف "كان اله هام"، عبادتو عمّت الشرق الادنى وبقت لحد اطلالة المسيحيي. ولتقت مكتوبات بتنزكر فيا رشف لوحدو بالاول وبعدين بينزفق بلقب او اسم إلهي بلبنان وبكل مناطق العالم اللبناني.
مكتوبات رشف بـ لبنان الحالي والفينيقي:
عدا عن المكتوبات المزكورا (منعني مكتوبات ايبلا البتعود لأواسط الالف التالت ومكتوبات ماري وهنا البتعود لـ بداية الالف التاني، ومكتوبات اوغاريت البتعود للقرن الرابع عشر)، لتقى معبد لرشف بجبيل بيرجع لبداية الالف التاني قبل المسيح هو معبد المسلاّت...
ويمكن يكون اهم اسر لرشف بالعالم. كمان لتقى ختم بصور بيحمل اسم "ملكارت- رشف" بيعود للقرن السابع. وكانو كمان الفينيقيي بجزيرة ايبيزا الكرتاجيي يتعبّدو هن كمان لرشف- ملكارت. كمان لتقت مكتوبي بصيدون بترجع للقرن الخامس بتحمل اسم رشف، كمان حي من المديني بيحمل اسمو. وبالمماليك الاراميي، كان الملك ياناموا يعبدو متل الالها ايل وهدد وغيرن.
كمان النص الفينيقي الحسّي اللي لتقى بـ كراتيبي، بيزكرو مملكة ادنا الواقعا اليوم بـ تركيا الكانت بأطراف لبنان- الفينيقي- الشماليي.
بيرجع هـ النص للقرن الثامن قبل المسيح وبيزكرو نصوص تدمريي جديدي نسلّين (وتدمر موجودي متلما منعرف بأطراف لبنان الكنعانيي- الفينيقيي- الشرقيي).
رشف بالتورا الموسويي
عدة مرات بيورد اسم رشف بالتورا الموسويي للدلالي ع هـ الاله او للدلالي ع مدن عطاها اسمو. بس هـ الاله ما بينزكر اسمو بقدر م بينزكر باسامي "المرض واللهيب والبرق". لهيك عتبروه العبران إله المرض والتعاسي والعاصفي. ع كل حال بهـ التورا واضح انو هـ الاله، هو اله كنعاني فينيقي.
عبادة رشف بمصر
تغلغلت عبادة رشف بالجنوب، بـ مصر من بداية الالف التاني قبل المسيح، ومنشوف اسمو بشكل مزدوج _عبر- رشف) بـ بردي بروكلن البيعود للقرن التمنتعش قبل المسيح.
وبيزكر نص نصب أبردين كمان اسن رشف بشكل "رشف- شلمن" وشلمن هو واحد من الالها الاموريي. ويمكن يكون هو زاتو شالم أو شلم واحد من الإلهين اللطيفين الجميلين الاوغاريتيين شحر وشالم. وع ايام امينوفيس التاني كانو يعتبرو رشف " شفيع الملك"، وضل الشعب بيتعبّدلو ع ايام الرعامسي متلما بيتبيّنلنا من انصاب دير المدنيي. وضلّت عبادتو متغلغلي بمصر لحد القرن الرابع، وحتى بايام البطاليس متلما بتدل محفوظات تورينو وغيرا.
رشف بكرتاجا والعالم الكرتاجي وقبرص
نعبد رشف بـ كل المناطق العالم اللبناني وخصوصن بـ كرتاجا ومعمّراتا متلما نعبد بقبرص معمرة صور، وهادا ما بين القرن الخامس والقرن التالت قبل المسيح. هيك بتفيدنا مكتوبات كرتاجا اللي نبنى فيا كمان معبد لـ الاله رشف. وسبق وقلنا انو مكتوبات جزيرة ايبيزا الكرتاجيي زكرت هي كمان الاله رشف. متلما زكرتو مكتوبات قبرص. وضلّت عبادتة رشف شايعا بـ كنعان- فينيقيا لحد بداية القرون المسيحيي متلما بتدلّ مكتوبات تدمر.
