المجد لله خيي القدّيس بونا شربل
كلمتين من خيك بالرّهبنة ومن يللي لعب دورك بفلم مار شربل بونا يوسف مونّس... وانت حميتو وعملت معو عجايبك...
لوين تارك محبستك ورايح على كاتدرائيّة سانت باتريك في قلب مدينة نيويورك بالولايات المتّحدة...
لوين رايح وقانون الحبساء ما بيسمحلك تترك ديرك والمحبسة الا بإذن الرّئيس والاب العام... وإنت ولا يوم خالفت أمر الطّاعة المقدّسة بكلّ حياتك...
هيك حملت حالك ومشيت وتركت المحبسة ودير مار مارون عنايا ولبنان وسافرت مش بس عا الولايات المتّحدة... رحت تدور بالعالم كلّو وتشفي كلّ النّاس وتعمل عجايب وتوزّع نعم وشفاءات وفرح ورجا بالعالم كلّو وتعمل محبستك بكلّ قلب إنسان مريض وموجوع... واليوم عملت لحالك محبسة بكنيسة القدّيس باتريك بنيويورك....
يا خيي بونا شربل (هيك نحنا بالرّهبنة منحكي بعضنا)... كيفك رايح عا هالدّني كلّها توزّع نعم وعجائب وتعمل شفاءات أكثر من كلّ أطباء العالم وإنت ممنوع تطلع من المحبسة وقضيت عمرك صمت ووحدة وصوم وصلاة.... وتعمل مجد لرهبنتك وإخوتك وكنيستك ووطنك لبنان أكثر من العالم كلها....
هيك رحت تزرع كنيستك ورهبنتك ووطنك وعجايبك وإنت لابس إسكيمك وعبايتك ومشلحك تدور بهالعالم تمجد الله وتشفي المرضى وتعمل عجايب بتحيّر العلم والطّبّ والمنطق والعقل... حملت مجد وطنك وكنيستك ورهبنتك وأرزك العالي ومجد الله ومحبتو لآخر أطراف الدّني.... وإنت بحياتك ما طلعت من محبستك... صمتك صار دويي...عزلتك صارت حضور صارخ... وصلاتك شتي نعم وعجايب.
خليك حدنا حمينا وشفينا من كلّ مرض نفسي أو جسدي واعطينا متلك نتقدّس ونمجد الله بحياتنا.
خيّك بونا يوسف الشّبانيّة
