7- الملاحم الشهيرا بتروي قصص أبطال الحاضرات اللبنانيي- الفينيقيي.
ما عادو يجهلو العلما انو ملاحم أوغاريت "المكتوبي لتسقيف الزغار"، متلما ورد ع قلم كاتبا، " هي نابعا من صميم الحضارا الكنعانيي، يعني الفينيقيي.
وكانت معروفي بكل الحاضرات الكنعانيي، متلما معروفي بأوغاريت، وأنو "المكتوبات" الفينيقيي المكتشفي بجبيل واللي بترجع للقرن العاشر ملاني نصوص بتزكرّ بهـ الادب الملحمي". وبتأكد هـ الشي مقتطفات "التاريخ الفينيقي" لسنخوني أتن اللي تبيّنتلنا كإنا المراجع السبوتيي المكتوبي لدعم هويّة هـ الملاحم. وصار متأكّدلنا كمان انو هـ النصوص اللي نكتبت بأواسط الألف التاني قبل المسيح بتحكي قصص أبطال عصر تور- ايل اللي ما عدنا نجهلن واللي صرنا نعرف- وعلما أوغاريت يعرفو معنا- إنّن عاشو ببداية الألف التالت قبل المسيح. ومن هـ الابطال إيل- كرونوس ملك جبيل والعالم، وتور، ملهمو العقبوي، والملك كرت (ملكرت- هرقل)، ملك الصيدونيّي، وباقي أفراد العيلي المالكي متل عنت- أتينا- مينرفا، بنت ايل، وأشيرا- عشتروت- فينوس، إخت الملك وملكة العالم المتجوّلي، والبعل أدونيس الجبيلي، وموت إبن ايل، الخ. وكل هودي رح نحكي عنن بعدان.
8- آلهة اليونان والرومان ومصر وميزوبوتاميا... هن ابطالنا مألّهين ومنن آلهة أوغاريت.
كتار من العلما تساءلو. مينن أبطال الملاحم الأوغاريتيي؟ ومنن بلّشو يحدسو إنن مش وهميّين. وإستنادن لفقرات من كتاباتن وكتابات القدما، ستخلصنا إنن بشر مألّهين وانو اكترّيتن بيعرفن العالم كلو، بس بعدن لحد منسوبين لأوطان غير لبنان، منّا مصر، وميزوبوتاميا وخصوصن اغريقيا وروما... ولهـ السبب بتتعنون القواميس اللي بتحكي عنن بعناوين أبرزا: "انسكلوبيدية (أو قاموس( الميتولوجيا الاغريقيي والرومانيي". والفرد مر عميحضّر مألّف من هـ النوع، بعنوان "قاموس الحضارا اللبنانيي"، ومن جملة الاشيا البيحكي عنا بهـ القاموس مجموعة "الآلها" الأوّلين اللي حكمو العالم ومدّنوه ببدايات التاريخ، والّهن أبطال لبنانيي تألّهو لأنن أحسنو للبشريّي. ومن هون رح نفهم إنو الميتولوجيا منّن بمعظمن الا تواريخ- خصوصن تاريخ لبنان الكنعاني- الفينيقيي- نخلطت فيا الاساطير الخرافيي بالمواقع والحقايق وصارت شي ممسوخ.
وصار بديهي للعلما انو الملاحم الاوغاريتيي المعروفي ما بتشكل الا جزء من مجموعة ملاحم عن أبطالنا المألّهين والباقي ضاع، وانو لهيك ما بتعطي كل الاخبار اللي بتحكي عنّن. بس، حتى ازا اخدناها متلما هي، بينفهم منّا إنا بتخص كل حاضرات لبنان الكنعاني- الفينيقي، متلما سبق وقلنا، بمعنى إنّا بتشكل لون من ألوان التراس الديني والمدني والأدبي والعلمي والتعليمي اللي هو مشترك بين كل حاضراتنا القديمي مش بس بلبنان الإم كمان بلبنان عبر البحار.
9- قصص الملاحم هيي قصص عاديّي عن ناس مش عاديّين.
اللي بيقرا بتمعّن قصص الملاحم الاوغاريتيي بيتعجّب إنن يكونو عتبروا أساطير خرافيي. طبعن المكتشفين والمترجمين والمحللين الاول من أمسال فيرولو ودورم وشفر- وهو الن فضل ما بيعلى عليه-معزورين يكونو طبعو وعتبرو هـ النصوص أساطيرز لأنو بعد الملاحم الاوغاريتيي- اللي صرنا نعرف إنّا وليدة بداية الألف التالت- عن منابعا، خلاّها يصير فيا بلبلي من النوع اللي صاب أكترية المكتوبات والكتابات القديمي المتناقلي ع إيدين الكتبي ولسانات الشعوب (ومنا التورا الموسويي). وهيك تعوكرت هـ النصوص ونصابت بتحريف وبتناقض. ومنلاحظ هـ الشي خصوصن بشخصية الملك ايل اللي ندمج مرّات بشخصية العبقري تور- هرمس، ومرّات بالاله الاكبر، يعنب بالله، متلما رح نشوف. وما ممكن للمأرّخ اللي ما بيعرف البدايات واللي ما قابل نصوص أوغاريت بمقاطع من كموسوغونية سنخوني أتن وغيرو إلا ما يلاحظ أمور متل هيدي. وواجهو علما أوغاريت النصوص المكتشفي بعقول مشبعا بخرافات الميتولوجيا الأغريقيي والرومانيي.
وبما إنو ابطال ملاحمنا بيحملو هن كمان ألقاب إلهيّي، كان طبيعي إنّن يعاملو ملاحم أوغاريت متل باقي الأخبار الإسطوريي القديمي.
وهلق، وبعدما مرق وقت كافي ع الترجمات الأوليّ، وتبعتا ترجمات غيرا، صار ممكن يكون الحكم عليا أسهل ومرّات أجدى. واللي منستخلصو نحن من هـ النصوص هو إنو الملاحم منّا أكتر من قصص بتحكي أخبار عاديي قليل ما بتتخللّا إشيا خارقان وقصص ناس بارزين بمجتمعهن، هن الملوك المعروفين بالآلها لأنن كتشفو أو خترعو، ع حد قول مأرّخينا، الأشيا اللي هي لخير البشر.
وقدامنا هلق نصوص أربع ملاحم هيي: ملحمة البعل وعنت، ملحمة الملك كرت (أو ملكرت)، ملك الصيدونيي، ملحمة أقهات بن دانيال، القاضي الحكيم، ملحمة مولد الإلهيين الوسيمين الجميلين شحر وشالم، وشقفي من ملحمي سمّوا ملحمة الرفاييم.
